Die wonderwerker
| Die wonderwerker | |
|---|---|
| Regisseur | Katinka Heyns |
| Produksieleier | André Scholtz |
| Draaiboek | Chris Barnard[1] |
| Met | Dawid Minnaar Elize Cawood Marius Weyers Cobus Rossouw Sandra Kotzé Anneke Weidemann Kaz McFadden |
| Musiek deur | Ben Ludik |
| Kinematografie | Koos Roets |
| Redigeerder | Ronelle Loots |
| Ateljee | Sonneblom Films |
| Verspreider | Ster-Kinekor |
| Uitgereik | 7 September 2012 |
| Land | Suid-Afrika |
| Taal | Afrikaans |
Die wonderwerker is ’n Afrikaanse rolprent oor die Suid-Afrikaanse digter en natuurkenner, Eugène Marais se verblyf by ’n gesin in die Waterberg in die hedendaagse Limpopo, Suid-Afrika terwyl hy in 1908 daar navorsing gedoen het oor termiete en bobbejane. Die prent het op 7 September 2012 in teaters begin draai.[2]
Genre
[wysig | wysig bron]Die rolprent is 'n drama. Dit het 'n 13M ouderdomsperk en is nie geskik vir jong kykers nie.
Hoofrolspelers
[wysig | wysig bron]
- Dawid Minnaar as Eugène Marais[3]
- Elize Cawood as Maria van Rooyen
- Marius Weyers as Gys van Rooyen
- Anneke Weidemann as Jane Brayshaw
- Kaz McFadden as Adriaan van Rooyen
- Cobus Rossouw as Jos van Deventer
- Sandra Kotzé as Hessie van Deventer
- Lika Berning as Annie
- Andries die bobbejaan[4][5]
Storielyn
[wysig | wysig bron]Die prent is gegrond op die tydperk toe Marais siek was aan malaria. Die prent toon hoe hy die gesin by wie hy gebly het, se lewens verander.[2]
Dit is die jaar 1908. Marais, baie siek aan malaria, kom op die plaas Rietfontein in die Waterberg aan, waar die Van Rooyenfamilie hom onderdak neem en versorg. Die familie bestaan uit Gys Van Rooyen, sy vrou Maria, hulle seun Adriaan en 'n aanneemdogter en huishulp, Jane Brayshaw.
Maria is 'n opgeleide vroedvrou met heelwat kennis van boererate en sy en Jane versorg Marais op sy pad na herstel. Malaria is egter nie Marais se enigste probleem nie. Sedert sy vrou Lettie se dood veertien jaar tevore met die geboorte van hulle eerste kind, het hy sy toevlug tot morfien geneem en geleidelik daaraan verslaaf geraak.
In sy lewe was Eugene Marais nie net 'n merkbare digter en natuurkenner nie, maar ook 'n buitengewone persoon wie se lewe 'n aanhoudende bron van drama en kontroversie was. In 1908 is hy 'n gekwalifiseerde regsgeleerde wat sopas twee jaar alleen in die afgeleë Waterberg bobbejane dopgehou, en hul gewoontes bestudeer, terwyl hy saam met hulle gelewe het.
Oppad na Nylstroom, in die greep van malariakoors, stop hy by 'n plaas langs en vra vir drinkwater. Gys van Rooyen en sy vrou Maria neem hom in om te herstel nadat hulle sien hoe siek en swak hy is.
Maria lei 'n onvervulde lewe en is alleen. Die veertigjarige Eugene Marais is aantreklik, innemend en misterieus. Sy raak verlief op hom, soos baie vroue voor haar. Daar is twee ander inwoners in die huis, die Van Rooyens se seun Adriaan, en hul sewentienjarige aangenome dogter Jane Brayshaw.
Marais se jong vrou, Aletta het twaalf jaar vantevore gesterf, terwyl sy geboorte geskenk het aan hul enigste kind. Dit is iets wat hy nooit in staat was om te verwerk nie. Jane is 'n opvallende beliggaming van haar. Geleidelik kom hy agter dat hy besig is om sy hart op haar te verloor. Sy hou ook van hom. Wat die saak verder kompliseer is dat die jong Adriaan self smoorverlief op Jane is.
Eugene Marais se geheime demoon is sy morfienverslawing. Hy is 'n hoë funksionerende verslaafde - wie se gedrag net beïnvloed word as hy dit nie gebruik nie. Maria ontdek sy geheim. In 'n poging om nie net sy verslawing onder beheer te bring nie, maar ook om hom te beheer, konfiskeer sy sy mofien en begin om dit terug aan hom te rantsoeneer.
Dit lei tot 'n liefdesdriehoek, wat soos 'n tydbom onvermydelik aanhou tik.
Die rolprent is in Afrikaans met Engelse onderskrifte.
Ontvangs
[wysig | wysig bron]
Die rolprent het by die loket, soos berig op 10 September 2012, reeds sowat 18 000 fliekgangers getrek. Dit het R733 391 by die loket verdien, wat die ander onlangse Afrikaanse rolprente, Roepman (R423 839) en Hoofmeisie (R406 954), oortref het.[6]
Die Suid-Afrikaanse rolprentresentent, Leon van Nierop, ken 9/10 vir Die wonderwerker toe:[7]
| “ | So ’n meesleurende, beeldskone en aangrypende Afrikaanse rolprent sien jy dalk net een maal per jaar. Dawid Minnaar is knap as Marais, maar dit is Sandra Kotzé, een van ons mees onderskatte aktrises, as tant Hessie, wat my verbysterd met haar spel gelaat het, terwyl Kaz McFadden met sy genuanseerde vertolking van die wilde seun, Adriaan, spel lewer wat die karakter geskakeerd en menslik maak. Die Wonderwerker moet ten alle koste gesien word. | ” |
Toekennings
[wysig | wysig bron]By die Silwerskermfees (2012) het die rolprent die volgende toekennings ontvang:[8]
- Beste film.
- Beste regie – Katinka Heyns.
- Beste draaiboek – Chris Barnard.
- Beste redigering – Ronelle Loots.
- Beste aktrise – Elize Cawood.
- Beste vroulike byspeler – Sandra Kotzé.
Sien ook
[wysig | wysig bron]Verwysings
[wysig | wysig bron]- ↑ "Potgooi: Katinka Heyns oor die fliek Eugene Marais: Die Wonderwerker, wat vanjaar verskyn" (Potgooi). RSG. 22 Februarie 2012. Besoek op 2 Maart 2012.
- ↑ 2,0 2,1 Pople, Laetitia (1 Maart 2012). "Eugène Marais in rolprent herbesoek" (html). Die Burger. Geargiveer vanaf die oorspronklike op 3 Maart 2012. Besoek op 2 Maart 2012.
- ↑ Van den Berg, Marzanne (25 Januarie 2012). "Katinka Heyns soek mak bobbejaan" (html). Volksblad. Besoek op 2 Maart 2012.[dooie skakel]
- ↑ Eckard, Lourensa (13 Februarie 2012). "Bobbejaan word 'n rolprentster" (html). Die Burger. Geargiveer vanaf die oorspronklike op 9 Oktober 2019. Besoek op 2 Maart 2012.
- ↑ "Gallo Images". www.galloimages.co.za (in Engels). Geargiveer vanaf die oorspronklike op 11 Junie 2020.
- ↑ "Die Wonderwerker treffer by loket". Geargiveer vanaf die oorspronklike op 17 Augustus 2013. Besoek op 17 Augustus 2013.
- ↑ agency, Developed by iCognition and WG2K digital. "RSG - Dis die een! -- Leon Se Flieks -- DIE WONDERWERKER". Radio Sonder Grense. Geargiveer vanaf die oorspronklike op 4 Maart 2016.
- ↑ Wenners by die kykNET Silwerskerm-fees, Litnet, 2012-09-06
