Wikipedia

Vlag van Kanada

Die nasionale vlag van Kanada[1] is op 15 Februarie 1965 amptelik in gebruik geneem. Die vlag vertoon drie vertikale bane in rooi, wit en rooi met ’n rooi elfpuntige esdoringblaar in die middel van die wit baan.

Vlag van Kanada
Vlag van Kanada
Vlag van Kanada
Bynaam (en) Maple Leaf Flag
(af) Die Esdoringblaar
(fr) l’Unifolié
(af) Die Eenblarige
Gebruik Burgerlike- en staatsvlag en vaandel Burgerlike en staatsvlag en -vaandel
Verhouding 1:2
Goedgekeur 15 Februarie 1965
Ontwerp Drie vertikale bane in rooi, wit en rooi met ’n rooi esdoringblaar in die middel van die wit baan.
Ontwerp deur George Stanley
John Matheson
Wisselvormvlag van Kanada
Wisselvormvlag van Kanada
Gebruik Oorlogsvlag Oorlogsvlag
Verhouding 1:2
Wisselvormvlag van Kanada
Wisselvormvlag van Kanada
Gebruik Vlootvaandel Vlootvaandel
Verhouding 1:2
Wisselvormvlag van Kanada
Wisselvormvlag van Kanada
Bynaam Weermagvaandel
Verhouding 1:2
Wisselvormvlag van Kanada
Wisselvormvlag van Kanada
Bynaam Lugmagvaandel
Verhouding 1:2

Die aanvaarding van die vlag in 1965 was die eerste keer dat ’n nasionale vlag vir Kanada gekies is om die Unievlag te vervang. Die Rooi Kanadese Vaandel is nieamptelik gebruik sedert die 1890’s en is in 1945 deur ’n algemene maatreël van bestuur goedgekeur vir gebruik "waarookal die plek of geleentheid hom voordoen om ’n kenmerkende Kanadese vlag te laat wapper."[2][3] In 1964 het Eerste Minister Pearson ’n komitee aangewys om die vraagstuk op te los. Dit het gelei tot ’n ernstige debat oor die verandering van die vlag. Uit drie opsies is George Stanley en John Matheson se esdoringontwerp wat gebaseer was op die vlag van die Koninklike Militêre Kollege van Kanada, gekies. Die vlag is die eerste keer op 15 Februarie 1965 ten toon gestel; hierdie datum word jaarliks gevier as die Nasionale Kanadese Vlagdag.[4]

Baie verskillende vlae is geskep vir gebruik deur Kanadese amptenare, regeringsliggame en militêre magte. Die meeste van hierdie vlae maak op die een of ander manier van die esdoringblaarmotief gebruik deur die Kanadese vlag in die skildhoek te hê of deur esdoringblare in die ontwerp te gebruik. Die Koninklike Unievlag is ook ’n amptelike vlag in Kanada en word gebruik as simbool van Kanada se lidmaatskap van die Britse Statebond, en die verbintenis tot die Kroon.[5][6][7] Die Unievlag is steeds ’n element in ander Kanadese vlae waaronder die provinsiale vlae van Brits-Columbië, Manitoba en Ontario.[8]

Simboliek

wysig

Die esdoringblaar het sedert die 1700’s gedien as simbool ter viering van die natuur en omgewing van wat vandag as Kanada bekend is.[9] Die hoeveelheid punte op die blaar het geen betekenis nie (dit stel dus nie die tien provinsies plus een punt vir die gebiede, soos die Australiese Gemenebesster,[10] voor nie). Die hoeveelheid punte en rangskikking daarvan is gekies nadat toetse in ’n windtonnel aangedui het dat die huidige ontwerp die minste wasig vertoon van die ontwerpe wat getoets is.[11] Die beeld van die esdoringblaar wat op die vlag gebruik word is ontwerp deur Jaques Saint-Cyr.[12] In 1921 het koning George V die amptelike kleure van Kanada vasgestel as rooi (van die Kruis van Sint Joris) en wit (van die Franse koninklike embleem sedert koning Karel VII).[13]

Ontwerp

wysig
 
Konstruksie-blad vir die ontwerp van die Kanadese vlag. Die hoogte van die vlag is twee maal die breedte daarvan.

Die lengte van die Esdoringvlag is twee keer die wydte. Die wit baan staan bekend as ’n Kanadese Paal (’n vierkantige baan in ’n vertikale driebaanvlag en genoem na die vlag van Kanada) en die twee rooi bane is so groot soos die helfte van die wit baan.[14] In die middel van die wit baan is ’n rooi esdoringblaar. In heraldiek is die vlag geblasoeneer as "rooi op ’n silwer Kanadese paal met ’n esdoringblaar."[15] Die blasoenering is op 5 Maart 2005 by die Kanadese Heraldiese Owerheid geregistreer.[16]

 
Konstruksietekening

Kleure

wysig
 
’n Wapperende Kanadese vlag.

Die kleurskema word hieronder gelys:

  Rooi Wit
RGB 255/0/0 255/255/255
Heksadesimaal #FF0000 #FFFFFF
Pantone Red 032 White
CMYK 0, 100, 100, 0 0, 0, 0, 0

Geskiedenis

wysig
 
’n Vroeë voorbeeld van ’n Kanadese Rooi Vaandel in 1876[17]
 
Plasing van die Kanadese Kleure op Gen. James Wolfe se Monument in die Westminster-abdy deur Emily Warren in die Currie Hall by die Koninklike Militêre Kollege van Kanada
 
Plakkaat van die Konserwatiewe Party vir die 1891-verkiesings met John A. Macdonald en ’n Rooi Vaandel sonder wapen
 
’n Kanadese poskaart ter geleentheid van die kroning van Koning George V in 1911, wat die koninklike Unievlag (laer) en ’n weergawe van die Rooi Vaandel met ’n gekroonde saamgestelde skild van Kanada (nie goedgekeur deur die soewereine nie) in die vlieg
 
Die koninklike proklamasie van die nasionale vlag van Kanada in 1965

Die eerste bekende vlag wat in Kanada gewapper het die Kruis van Sint Joris wat John Cabot toe hy Newfoundland in 1497 bereik het. In 1534 het Jacques Cartier ’n kruis geplant in Gaspé met die Franse koninklike wapenskild met die fleur-de-lis. Sy skip het ’n rooi vlag met ’n wit kruis gehad wat op daardie tydstip die vlag van Frankryk was. Nieu-Frankryk het steeds die Franse militêre vlae van die periode gebruik.[3][18]

Die Koninklike Unievlag is sedert die Britse nedersetting in Nova Scotia in 1621 in Kanada gebruik. Sedert die oorgawe van Frankryk aan die Verenigde Koninkryk in die vroeë 1760’s, is die Koninklike Unievlag, bekend as die Union Jack in die Verenigde Koninkryk gebruik as die de jure nasionale vlag, net soos in die Verenigde Koninkryk, tot met die aanvaarding van die huidige vlag in 1965.[3]

Kort na die Kanadese Konfederasie in 1867 het die behoefte aan ’n unieke Kanadese vlag ontstaan. Die eerste Kanadese vlag was die Vlag van die Goewerneur-generaal van Kanada, ’n koninklike Unievlag met ’n skild in die middel waarop die wapenskild van Ontario, Quebec, Nova Scotia en Nieu-Brunswick in die vier kwarte was. Die skild was omring deur ’n krans van esdoringblare.[19] In 1870 is begin om die Rooi Vaandel, met die toevoeging van die Kanadese saamgestelde skild op die wapperkant, nieamptelik op land en see te gebruik en dit het bekend gestaan as die Rooi Kanadese Vaandel. Soos nuwe provinsies by die Konfederasie gevoeg is, is die skild opgedateer. In 1892 het die Britse Admiraliteit die gebruik van die Rooi Vaandel vir gebruik deur Kanada op see goedgekeur. Die saamgestelde skild is in 1921, met die toekenning van ’n wapenskild aan Kanada, deur die nuwe wapenskild vervang en in 1924 het ’n algemene maatreël van bestuur dit goedgekeur vir gebruik van oorsese Kanadese geboue.[3] In 1925 het William Lyon Mackenzie King, Eerste Minister van Kanada, ’n komitee opgestel om ’n vlag te ontwerp wat op Kanadese bodem gebruik kan word. Die komitee is egter ontbind voordat ’n finale verslag saamgestel kon word. Ten spyte van die mislukking van die komitee om die vraagstuk op te los, was die sentiment van die publiek in die 1920’s ten gunste van ’n oplossing vir die Kanadese vlagprobleem.[20]

Gedurende die Tweede Wêreldoorlog was die Rooi Vaandel die vlag wat die Kanadese troepe op die slagveld gebruik het. Die Rooi Kanadese Vaandel is binne en buite Kanada gebruik as die Kanadese vlag. ’n Gesamentlike komitee van die Senaat en die Laerhuis is op 8 November 1945 aangestel om ’n nasionale vlag voor te stel wat amptelik aanvaar kon word. Teen 9 Mei 1946 is 2 695 voorstelle ingedien en die komitee het gerapporteer "dat die nasionale vlag van Kanada die Rooi Kanadese Vaandel moet wees met ’n esdoringblaar in herfskleure teen ’n wit agtergrond". Die Wetgewende Vergadering van Quebec het egter by die komitee gepleit om nie "buitelandse simbole" (insluitend die Koninklike Unievlag) in te sluit nie. Eerste Minister MacKenzie King het nie op die verslag gereageer nie en die Rooi Kanadese Vaandel het vir eers gebly.[13][19][21]

Teen die 1960’s het die debat om ’n nuwe Kanadese vlag egter in so ’n mate toegeneem dat dit uitgeloop het in die Groot Vlagdebat van 1964.[22] In 1963 het die Liberale minderheidsregering van Lester B. Pearson die mag verkry en besluit om ’n amptelike Kanadese vlag deur middel van parlementêre debat te kry. Die hoof politieke voorsteller van die verandering was Eerste Minister Pearson. Hy was ’n beduidende makelaar tydens die Suezkrisis van 1956, waarvoor hy die Nobelprys vir Vrede gekry het.[23] Gedurende die krisis is Pearson onderbreek toe die Egiptiese regering beswaar gemaak het teen Kanadese vredesmagte op grond daarvan dat die Kanadese vlag (die Rooi Vaandel) dieselfde simbool (die Koninklike Unievlag) as die Verenigde Koninkryk, een van die oorlogvoerders, bevat het.[23] Pearson se doel was vir die Kanadese vlag om kenmerkend en onderskeidend Kanadees te wees. Die hoofopponent teen die verandering van die vlag was die opposisieleier en voormalige Eerste Minister, John Diefenbaker, wat dit uiteindelik ’n private kruisvaart gemaak het.[24]

Pearson was die leier van ’n minderheidsregering en het die risiko geloop om die mag te verloor a.g.v. die vlagkwessie; hy het egter geweet dat die Rooi Vaandel en die Unievlag nie gewild was in Quebec, waar die Liberale sterk steun geniet het, nie. Die Rooi Vaandel was die voorkeur van die meeste Engelssprekende Kanadese. Op 27 Mei 1964 het Pearson se regering ’n mosie by die parlement ingedien vir die aanvaarding van sy gunsteling ontwerp van ’n "see-tot-see" vlag met ’n blou rand en drie saamgesnoerde rooi esdoringblare op ’n wit agtergrond. Hierdie mosie was die oorsaak van weke se bitsige debat in die parlement en die ontwerp het bekend geword as die "Pearson-wimpel".[25] Diefenbaker het ’n referendum oor die vlagvraagstuk geëis maar Pearson het in plaas van ’n referendum ’n veelparty parlementêre komitee van 15 lede saamgestel om ’n nuwe ontwerp te kies. Deur ’n periode van bestudering met politieke manoeuvrering het die komitee op die huidige ontwerp besluit wat deur George Stanley geskep is en geïnspireer is deur die vlag van die Koninklike Militêre Kollege van Kanada in Kingston, Ontario. Die ontwerp is op 29 Oktober 1964 eenparig deur die komitee goedgekeur en later deurgevoer deur ’n meerderheidstem in die Kanadese Laerhuis op 15 Desember 1964. Die Kanadese Senaat het twee dae later ook die ontwerp goedgekeur.[13]

Koningin Elizabeth II het die nuwe vlag op 28 Januarie 1965 geproklameer.[13] Die vlag is op 15 Februarie 1965 ingewy tydens ’n amptelike seremonie op die Parlementsheuwel in Ottawa in die teenwoordigheid van Goewerneur-generaal majoor-generaal Georges P. Vanier, die Eerste Minister, lede van die kabinet en Kanadese parlementariërs. Die Rooi Kanadese Vaandel en die skild van die koninklike wapen van Kanada is 12:00 gestryk en die nuwe Esdoringvlag is gehys. Die skare het die nasionale lied, "O Canada" gesing waarna die sing van "God Save the Queen" gevolg het.[4] Maurice Bourget, Speaker van die Senaat, het gesê: "Die vlag is die simbool van die eenheid van die nasie omdat dit, bo enige twyfel, al die burgers van Kanada sonder onderskeid van ras, taal, oortuigings of opinie verteenwoordig."[4] Vir die eeufeesvieringe van die nasie in 1967, het die Kanadese regering die Kanadese wapen (waarvan die skild op die Rooi Vaandel gepryk het) op ’n rooi vlag gebruik.[26]

Ander vlae

wysig
  •  
      Vlag van Frankryk, 1534 tot 1604
  •  
      Franse handelsvlag, 1604 tot 1663
  •  
      Vlag van Nieu-Frankryk, 1663 tot 1763
  •  
      Vlag van die Hudson's Bay Company, 1682 tot hede
  •  
      Die Unievlag van Groot Brittanje, 1763 tot 1800
  •  
      Vlag van die Verenigde Koninkryk, 1801 tot hede
  •  
      Vlag van Kanada, 1868 tot 1921
  •  
      Vlag van Kanada, 1921 tot 1957
  •  
      Vlag van Kanada, 1957 tot 1965
  •  
      Vlootvaandel van Kanada, 1868 tot 1921
  •  
      Vlootvaandel van Kanada, 1921 tot 1957
  •  
      Vlootvaandel van Kanada, 1957 tot 1965
  •  
        Voorgestelde vlag van Kanada, 1946
  •  
    Vlag van die Koninklike Militêre Kollege van Kanada waarop die huidige vlag van Kanada gebaseer is
  •  
      Vroeëre weergawe van die huidige vlag, 1964
  •  
        Die eerste voorstel aan die Kanadese Parlement (bekend as die Pearson-wimpel), 1964
  •  
        Nog ’n voorgestelde vlag, 1964
  •  
      Die Kanadese dualiteitsvlag
  •  
    Vlag van die Goewerneur-Generaal van Kanada
  •  
    Standaard van koning Charles III in Kanada

Alternatiewe vlae

wysig
 
Die Kanadese vlag tussen die vlag van Frankryk (links) en die Rooi Kanadese Vaandel (regs) by die Kanadese Nasionale Vimy Gedenkteken

As ’n simbool van Kanada se lidmaatskap van die Britse Statebond is die Koninklike Unievlag steeds ’n amptelike vlag in Kanada en dit word met sekere geleenthede gebruik.[27] Regulasies vereis dat federale instellings die Unievlag langs die Esdoringvlag moet vertoon indien dit moontlik is, deur van ’n tweede vlagpaal gebruik te maak op die volgende dae: Statebonddag (die tweede Maandag in Maart), Victoriadag (wat ook die vorstin se amptelike verjaardag in Kanada is) en die herdenking van die Statuus van Westminster (11 Desember). Die Unievlag kan ook by die Nasionale Oorlogsmuseum of ander plekke waar seremonies is wat Kanada se betrokkenheid met ander nasies in die Statebond eer (in tye van oorlog), vertoon word. Die Esdoringvlag neem altyd die ereplek in en word dus eerste gehys.[27] Die Unievlag is ook deel van die provinsiale vlae Ontario en Manitoba waar dit in die skildhoek is. ’n Gewysigde weergawe word in die vlag van Brits-Columbië gebruik en die vlag van Newfoundland en Labrador is ’n gestileerde weergawe van die Unievlag.[27] Verskeie van die provinsiale luitenant-goewerneursvlae het voorheen ’n gewysigde Unievlag gebruik as hul persoonlike vaandel gebruik maar die luitenant-goewerneurs van Nova Scotia is die enigste een wat hierdie ontwerp behou het.[27] Die Unievlag en die Rooi Kanadese Vaandel word steeds deur veteraangroepe en ander wat Kanada se verbintenis met Brittanje wil beklemtoon, in Kanada gebruik.[27]

Die Rooi Vaandel word ook soms gebruik waarby amptelike gebruik by sommige seremonies. Dit is gebruik by die herdenkings van die Slag van Vimyrif in 2007.[28][29] Hierdie besluit het kritiek ontlok van diegene wat gevoel het dat dit nie gelyk gestel moet word aan die Kanadese vlag nie en dit is geprys deur diegene wat gevoel het dat dit belangrik is dat Kanada haar bande met die verlede moet behou.[28][29]

Die Kanadese Dualiteitsvlag is ’n nieamptelike vlag wat onafhanklik ontwikkel is en is oorspronklik gesirkuleer deur die voorstanders daarvan om die eenheid van Kanada ten toon te stel by byeenkomste vir die "nee"-stem in oploop tot die 1995 Quebecreferendum.[30] Die ontwerp is gekies om die Franssprekende populasie tot die Esdoringvlag te voeg deur blou bane by te voeg (die blou en rooi in rofweg in die verhouding van die hoeveelheid Engelssprekende en Franssprekende mense in Kanada woon). Daar is op blou besluit omdat dit die hoofkleur is in die vlag van Quebec.[31][32]

In Quebec word die provinsiale vlag (’n wit Sint Joriskruis op ’n blou agtergrond met ’n fleur-de-lis in elke kwardant) dikwels beskou as ’n nasionale vlag saam met die Esdoringvlag, net soos die Acadiese vlag in die Acadiese gebiede van die maritieme provinsies.[12][33]

Protokol

wysig
 
Opvou van die Kanadese vlag
 
Die Kanadese vlag op halfmas op die Vredestoring van die Parlementsgebou in Ottawa ter herinnering aan Jack Layton op 22 Augustus 2011

Daar is geen wette wat die korrekte gebruik van die Kanadese vlag beheer. Kanadese Erfenis het egter riglyne uitgebring oor hoe die Kanadese vlag alleen en saam met ander vlae vertoon/gebruik moet word. Die riglyne bespreek die volgorde van voorkeur waarin die Kanadese vlag gebruik word, waar die vlag gebruik kan word en wat mense kan doen om eerbied teenoor die vlag te betoon. Die riglyne, getiteld Vlagetiket in Kanada ((en) Flag Etiquette in Canada) is deur die Kanadese Erfenis in boekformaat uitgegee en dit is op April 2003 opgedateer.[34] Die vlag mag enige dag, enige tyd van die dag op enige gebou wat deur die Kanadese Regering, lughawens, militêre basisse, diplomatieke kantore en burgerlikes beheer word, vertoon word. Wanneer die vlag vertoon word moet dit op sy eie vlagpaal hang en dit mag nie minderwaardig teenoor ander vlae wees nie, met die uitsondering van, in volgorde van baie na min belangrik, die koning se persoonlike Kanadese vlag, die vlag van die Goewerneur-generaal van Kanada, enige persoonlike vlag van ’n lid van die Kanadese Monargie of vlae van die Luitenant-goewerneurs van Kanada.[35] Om ’n tydperk van rou aan te dui word die Kanadese vlag halfstok gehang. Die Kanadese Magte het ’n spesiale protokol vir die vou van die vlag vir tentoonstellings soos ’n amptelike begrafnis; die Kanadese Magte stel dit egter nie vir daaglikse gebruik voor nie.[36]

Bevordering van die vlag

wysig
 
’n Voorbeeld van items van die Parlementêre Vlagprogram
 
Reuse Kanadese vlag in Vancouver vir die Olimpiese Winterspele 2010

Sedert die aanvaarding van die Kanadese vlag in 1965 het die Kanadese regering programme geborg om die vlag te bevorder. Voorbeelde sluit die Kanadese Parlementêre Vlagprogram van die Departement van Kanadese Erfenis en die vlagprogram wat deur die Departement van Openbare Werke gedryf is. Hierdie programme het die blootstelling van die vlag en die konsep dat dit deel is van die nasionale identiteit, verhoog. Om bewustheid van die vlag te verhoog is die Parlementêre Vlagprogram in Desember 1972 ingestel. Die doel van die program was om lede van die Kanadese Laerhuis toe te laat om vlae en lapelwapens in die vorm van die Kanadese vlag te versprei in hulle kiesafdelings. Die program is sedert 1973 aan die gang.[37] Vlae wat op die Vredestoring en die Oos- en Wesblokke van die Parlementsheuwel word verpak deur die Departement van Openbare Werke en kan gratis verkry word. Die program het egter ’n 19-jaar wagperiode vir vlae van die Oos- en Wesblok en 27-jaar vir vlae van die Vredestoring.[38]

Sedert 1996 is 15 Februarie herdenk as die Nasionale Kanadese Vlagdag.[4] In 1996 het Sheila Copps, Minister van Kanadese Erfenis, die "een-in-’n-miljoen-vlag-uitdaging" ingestel.[39] Hierdie program was daarop gemik om die Kanadese burgers van ’n miljoen nuwe Esdoringvlae te voorsien vir die Vlagdag van 1997. Die program was egter kontroversieel omdat dit ’n geraamde $45 miljoen gekos het en die vlae kan ook nie gehys word nie. Amptelike syfers van Kanadese Erfenis het die uitgawes op $15,5 miljoen geraam, met ongeveer ’n sewende van die koste wat deur donasies gedek is.[40]

Nalatenskap

wysig

’n Gedenkplaat wat die skepping van die Kanadese vlag herdenk, is in 1985 by die Koninklike Militêre Kollege van Kanada (KMK) in Kingston, Ontario aangebring. In Maart 1964 het kolonel George Stanley, Dekaan van Kunste, terwyl hy op die Mackenzie gebou gestaan en kyk het na die Kollegevlag naby die paradeplein, voorgestel aan kolonel J.R. Matheson, toe LP vir Leeds, dat die KMK Kollegevlag as basis gebruik moet word vir die nuwe vlag. Die twee het saam gewerk aan ’n ontwerp wat uiteindelik goedgekeur is deur die parlement en deur ’n koninklike proklamasie op 15 Februarie 1965 as die Nasionale Vlag van Kanada aanvaar is.[41]

Verwysings

wysig
  1. ↑ (en) Kanadese Erfenis – Jy wou weet... Geargiveer 8 Junie 2011 op Wayback Machine
  2. ↑ (en) Stacey, C. P., red. (1972). "19. Order in Council on the Red Ensign, 1945". Historical documents of Canada. Vol. 5. New York Stad: St. Martin’s Press. p. 28. ISBN 0-7705-0861-8.
  3. ↑ 3,0 3,1 3,2 3,3 (en) "First "Canadian flags"". Departement van Kanadese Erfenis. 24 September 2007. Geargiveer vanaf die oorspronklike op 27 Julie 2013. Besoek op 16 Desember 2008.
  4. ↑ 4,0 4,1 4,2 4,3 (en) "The National Flag of Canada; A symbol of Canadian Identity". Departement van Kanadese Erfenis. Geargiveer vanaf die oorspronklike op 27 Julie 2013. Besoek op 15 Februarie 2007.
  5. ↑ (en) "The Royal Union flag (Union Jack)". Canadian Heritage. 17 November 2008. Geargiveer vanaf die oorspronklike op 27 Julie 2013. Besoek op 9 Maart 2015.
  6. ↑ (en) "Statement by the Hon. Jason Kenney, PC, MP, Secretary of State (Multiculturalism and Canadian Identity) on Commonwealth Day". Canadian Heritage. 10 Maart 2008. Geargiveer vanaf die oorspronklike op 11 November 2011. Besoek op 10 Maart 2008.
  7. ↑ (en) "Royal Union Flag". Canadian Heritage / Patrimoine canadien. Geargiveer vanaf die oorspronklike op 13 April 2008. Besoek op 19 Augustus 2011.
  8. ↑ (en) Fraser, Alistair. The Royal Union Flag. Pennsylvania State Universiteit.
  9. ↑ (en) "The Maple Leaf". Departement van Kanadese Erfenis. Geargiveer vanaf die oorspronklike op 27 Julie 2013. Besoek op 16 Desember 2008.
  10. ↑ (en) "You were asking..." Departement van Kanadese Erfenis. Geargiveer vanaf die oorspronklike op 27 Julie 2013. Besoek op 13 April 2008.
  11. ↑ (en) Matheson, Col. John R. (1986), Canada’s Flag, Mika Publishing Company, ISBN 0-919303-01-3 
  12. ↑ 12,0 12,1 (en) Archbold, Rick (15 Februarie 2002). I Stand for Canada: The Story of The Maple Leaf Flag. Macfarlane, Walter & Ross. ISBN 1-55199-108-X.
  13. ↑ 13,0 13,1 13,2 13,3 (en) "Birth of the Canadian flag". Departement van Kanadese Erfenis. Geargiveer vanaf die oorspronklike op 27 Julie 2013. Besoek op 16 Desember 2008.
  14. ↑ (en) "The National Flag of Canada: Colours Specification". Departement van Kanadese Erfenis. 1 Januarie 2003. Geargiveer vanaf die oorspronklike op 27 Julie 2013. Besoek op 16 Desember 2008.
  15. ↑ (en) "Emblems of Canada". Die Kanadese Ensiklopedie. Geargiveer vanaf die oorspronklike op 13 Junie 2008. Besoek op 25 Maart 2008.
  16. ↑ (en) "Registration of the National Flag of Canada". The Public Register of Arms, Flags and Badges of Canada. Die Kanadese Heraldiese Owerheid. 15 Maart 2005. Besoek op 22 Mei 2019.
  17. ↑ (en) "Evolution of the Canadian Red Ensign" (PDF). Canadian Heritage. Geargiveer (PDF) vanaf die oorspronklike op 17 Mei 2019. Besoek op 22 Mei 2019.
  18. ↑ (en) "National Flag and Emblems". Portrait of Québec. Regering van Quebec. 12 Oktober 2006. Geargiveer vanaf die oorspronklike op 2 November 2014. Besoek op 20 April 2008.
  19. ↑ 19,0 19,1 (en) Fraser, Alistair B. (30 Januarie 1998). "A Canadian Flag for Canada". The Flags of Canada. Besoek op 22 Mei 2019. {{cite book}}: Onbekende parameter |chapterurl= geïgnoreer (hulp)
  20. ↑ (en) (Archbold, 61)
  21. ↑ (en) "The Flag Debate". Mount Allison Universiteit. Geargiveer vanaf die oorspronklike op 28 Mei 2010. Besoek op 17 April 2008.
  22. ↑ (en) "The Great Flag Debate". CBC. Besoek op 13 April 2008.
  23. ↑ 23,0 23,1 (en) Thorner, Thomas (2003), A Country Nourished on Self-Doubt: Documents in Post-Confederation Canadian History, Broadview Press, ISBN 1-55111-548-4 
  24. ↑ (en) "The Great Canadian Flag Debate". CBC. Geargiveer vanaf die oorspronklike op 5 Februarie 2012. Besoek op 31 Maart 2008.
  25. ↑ (en) Reeve, Iain (21 Mei 2007). "Wrong turns on the road of symbolism". The Peak. Geargiveer vanaf die oorspronklike op 25 Februarie 2012. Besoek op 13 April 2008.
  26. ↑ (en) Thompson, Hugh (2002), Canada, Dorling Kindersley, ISBN 0-7894-9561-9 
  27. ↑ 27,0 27,1 27,2 27,3 27,4 (en) "The Royal Union Flag". Departement van Kanadese Erfenis. 1 Januarie 2003. Besoek op 20 Mei 2006.
  28. ↑ 28,0 28,1 (en) "Globe Editorial: Red Ensign". The Globe and Mail. 31 Maart 2007. Geargiveer vanaf die oorspronklike op 26 Desember 2008. Besoek op 13 April 2008.
  29. ↑ 29,0 29,1 (en) Peritz, Ingrid (9 Julie 2007). "Dallaire slams decision to fly Red Ensign". The Globe and Mail. Geargiveer vanaf die oorspronklike op 26 Desember 2008. Besoek op 13 April 2008.
  30. ↑ (en) "Flag waver hoping for unity". Ottawa Sun. 1 Julie 1995. p. 4.
  31. ↑ (en) "Canadian Duality Flag". Canadian Duality. Geargiveer vanaf die oorspronklike op 1 November 2019. Besoek op 22 Mei 2019.
  32. ↑ (en) "Flying the flag". The Gazette. 3 Oktober 1996. p. 4.
  33. ↑ (en) "Flag and emblems of Québec, An Act respecting the, R.S.Q. D-12.1". CanLil. 1 September 2004. Geargiveer vanaf die oorspronklike op 24 Desember 2008. Besoek op 25 Maart 2008.
  34. ↑ (en) "Rules for Flying the Flag". Departement van Kanadese Efrenis. 1 April 2003. Geargiveer vanaf die oorspronklike op 28 Julie 2013. Besoek op 25 Maart 2008.
  35. ↑ (en) "The Honours, Flags and Heritage Structure of the Canadian Forces" (PDF). Departement van Nasionale Verdediging (Kanada). Geargiveer vanaf die oorspronklike (PDF) op 25 Maart 2009. Besoek op 25 Maart 2008.
  36. ↑ (en) "Process for the Ceremonial Folding of the National Flag of Canada". Directorate of History and Heritage – National Defence Canada. 23 April 2008. Geargiveer vanaf die oorspronklike op 23 Februarie 2020. Besoek op 22 Mei 2019.
  37. ↑ (en) "Administration of the Parliamentary Flag Program". Departement van Kanadese Erfenis. 1 Januarie 2003. Geargiveer vanaf die oorspronklike op 28 Julie 2013. Besoek op 20 Mei 2006.
  38. ↑ (en) "Frequently Asked Questions". Regering van Kanada. Geargiveer vanaf die oorspronklike op 20 Desember 2008. Besoek op 25 Maart 2008.
  39. ↑ (en) Dee, Duncan (19 Februarie 1996). "Heritage Minister Sheila Copps Launches "One In A Million National Flag" Campaign". Departement van Kanadese Erfenis. Geargiveer vanaf die oorspronklike op 12 Maart 2007. Besoek op 25 Maart 2008.
  40. ↑ (en) Arnsby, Julia (15 Februarie 1997). "Canadians Meet the "One in a Million National Flag" Challenge". Departement van Kanadese Erfenis. Geargiveer vanaf die oorspronklike op 16 Mei 2007. Besoek op 25 Maart 2008.
  41. ↑ (en) Vlag van Kanada

Bronnelys

wysig
  • (en) Archbold, Rick (2002). I Stand For Canada. Macfarlane Walter & Ross. ISBN 1-55199-108-X. {{cite book}}: Ongeldige |ref=harv (hulp)
  • (en) Matheson, Col. John R. (1986). Canada’s Flag. Mika Publishing Company. ISBN 0-919303-01-3. {{cite book}}: Ongeldige |ref=harv (hulp)
  • (en) Stanley, Dr. George F.G. (1965). The Story of Canada’s Flag: A Historical Sketch. Ryerson Press.
  • (en) Thompson, Hugh (2002). Canada. Dorling Kindersley. ISBN 0-7894-9561-9.
  • (en) Thorner, Thomas (2003). A Country Nourished on Self-Doubt: Documents in Post-Confederation Canadian History. Broadview Press. ISBN 1-55111-548-4.

Eksterne skakels

wysig
Hierdie artikel is in sy geheel of gedeeltelik vanuit die Engelse Wikipedia vertaal.
Ontsluit van "https://af.wikipedia.org/w/index.php?title=Vlag_van_Kanada&oldid=2721380"