Vlag van Ghana

Die nasionale vlag van die Ghana is op 6 Maart 1957 amptelik in gebruik geneem (dit is die datum wat Ghana onafhanklik van die Verenigde Koninkryk verkry het). Die vlag vertoon ’n rooi-geel-groen driekleur (die Pan-Afrika kleure) met ’n swart ster in die middel van die geel baan.

Vlag van Ghana

Vlag van Ghana
Gebruik	Nasionale vlag en Staatsvaandel
Verhouding	2:3
Goedgekeur	6 Maart 1957
Ontwerp	’n Horisontale driekleur met rooi, geel en groen bane met ’n swart ster in die middel van die vlag.
Ontwerp deur	Theodosia Okoh
Wisselvormvlag van Ghana
Gebruik	Burgerlike vaandel
Verhouding	2:3
Ontwerp	’n Rooi vlag met die vlag van Ghana met ’n swart fraiing in die skildhoek.
Wisselvormvlag van Ghana
Gebruik	Vlootvaandel
Verhouding	2:3
Ontwerp	’n Kruis van Sint Joris met die vlag van Ghana in die skildhoek.

Simboliek

Die kleure van die Ghanese vlag (die Pan-Afrika kleure) simboliseer die land se onderlinge band en onafhanklikheid van Afrikalande. Baie ander Afrikalande het die kleure van die Ethiopiese vlag in gebruik geneem, waarvan Ghana die eerste was om dit te doen.

Elke kleur op die vlag het ook ’n simboliese betekenis. Rooi stel die bloed van diegene voor wat om onafhanklikheid geveg het (wat ironies is aangesien Ghana op ’n vreedsame manier onafhanklikheid verkry het), geel (goud) stel die rykdom van Ghana se natuurlike hulpbronne voor (die naam Goudkus, soos die belangrikste deel van Ghana onder Britse bewind geheet het is ’n goeie aanduiding), groen stel die woude en vrugbare akkers van die land voor en die vyfpuntige swart ster stel die vryheid van Afrika voor.

Geskiedenis

Tussen 1821 en 1877 het dit deel uitgemaak van Brits-Wes-Afrika en is ’n vlag van die kolonie gebruik (’n blou Britse vaandel) met die koloniale embleem. As afsonderlike Britse kolonie (1877 tot 1957) was die naam van die gebied die Goudkus. ’n Blou Britse vaandel met die koloniale wapen van die Goudkus aan die wapperkant is toe amptelik gebruik. Op die koloniale wapen staan ’n olifant voor ’n palmboom en ’n groen berglandskap. Onder die olifant staan in rooi letters die voorletters van die gebied (G.C.). Gambië, Nigerië (toe die Lagos-kolonie) en Sierra Leone, ook voormalige Britse kolonies, het dieselfde koloniale wapen gebruik maar met hul eie voorletters daarop (G., L. en S.L. onderskeidelik).

Enkele jare na onafhanklikheidwording is die geel in die vlag na wit verander, wat die kleur van die Convention People’s Party was. Hierdie verandering is in 1966 ongedaan gemaak.

• 
  Vlag van die Asjantiryk (1670–1902 en 1935–1957)
• 
  Vlag van Brits-Wes-Afrika (1870–1888)
• 
  Vlag van die Britse goewerneur (1870–1888)
• 
  Vlag van die Goudkus (1877–1957)
• 
  Vlag van die Britse goewerneur van die Goudkus (1877–1957)
• 
  Voorgestelde Vlag van Togoland (1914)
• 
  Vlag van Ghana (1957–1958)
• 
  Vlag van die Unie van Afrika-state (November 1958 tot April 1961)
• 
  Vlag van die Unie van Afrika-state (April 1961–1962)
• 
  Vlag van Ghana (1962–1964)
• 
  Nationale vlag (1964–1966)
• 
  Vlag van Ghana (sedert 1966)

Ander vlae

• 
  Burgerlike lugvaartvaandel van Ghana
• 
  Vaandel van die Ghanese Lugmag
• 
  Ghanese Presidentsvlag
• 
  Vlag van die Ewe
• 
  Vlag van die Hausa
• 
  Vlag van die Joroeba

Eksterne skakels

• (en) Ghana by Flags of the World
• (en) "Flag of Ghana". Encyclopædia Britannica. Besoek op 24 Maart 2020.

Hierdie artikel is in sy geheel of gedeeltelik vanuit die Nederlandse Wikipedia vertaal.