Teenpous Alexander V
Alexander V[1][2] gebore Petros Philargos ook Petrus van Candia of Petrus Philargos genoem (Candia = Kreta) was 'n teenpous tydens die Westerse Skisma met sy setel in Pisa. Hy was 'n teenpous van Pous Gregorius XII van 1409 tot aan sy dood in 1410.
| Teenpous Alexander V | |
|---|---|
 Teenpous Alexander V
 | |
| Geboortenaam | Petros Philargos de Candia |
| Geboorteplek | Neapoli, Kreta |
| Geboortedatum | 1339 |
| Sterfdatum | 3 Mei 1410 |
| Sterfplek | Bologna |
| Teenpous van | Pous Gregorius XII |
| Begin van pontifikaat | 26 Junie 1409 |
| Einde van pontifikaat | 3 Mei 1410 |
Biografie
wysigAlexander[3] was Grieks van afkoms, gebore op Kreta. Hy was 'n Franciskaner monnik en het gestudeer aan die universiteite van Oxford en Cambridge. Hy is aangestel as kardinaal deur Pous Innocentius VII op 12 Junie 1407 en was aartsbiskop van Milaan. Die konsilie van Pisa in 1409 het probeer om die Westerse Skisma te beëindig deur beide Pous Gregorius XII en Teenpous Benedictus XIII af te set en Alexander as nuwe pous te kies. Dit het nie gewerk nie en nou was daar drie pouse, een in Rome een in Avignon en een in Pisa. Alexander het die steun gehad van die grootste deel van die Christelike wêreld naamlik die kerke in Frankryk, Engeland, Boheme en 'n groot deel van Duitsland. In 1410 het hy aartsbiskop Zbynek van Praag opdrag gegee om die werke van die hervormer Wycliffe te verbrand. Na 'n pontifikaat van slegs tien maande sterf Alexander onverwags op 3 Mei 1410. Hy word begrawe in die Franciskus kerk in Bologna en opgevolg deur Teenpous Johannes XXIII. Hoewel Alexander deur die Roomse Kerk as 'n teenpous beskou word, is daar nie 'n wettig pous met die naam Alexander V nie. Die volgende Alexander is die wettige pous Pous Alexander VI.
Verwysings
wysig- ↑ Alexander (V). (2008). Encyclopædia Britannica. Deluxe Edition. Chicago: Encyclopædia Britannica.
- ↑ Peterson, J.B. (1907). Alexander V. In The Catholic Encyclopedia. New York: Robert Appleton Company. Besoek op 24 Julie, 2014 by New Advent:[1]
- ↑ Miranda, S. The Cardinals of the Holy Roman Church[2]
| Hierdie artikel is in sy geheel of gedeeltelik vanuit die Nederlandse Wikipedia vertaal. |
